08 мај 2026
• од Стефан Николов
Заменик-генералната секретарка на НАТО, Радмила Шеќеринска, во средата, 6 мај 2026 година, се сретна со Претседателството на Босна и Херцеговина, чии членови учествуваа и на состанок на Северноатлантскиот совет.
Шеќеринска ја истакна непоколебливата посветеност на НАТО кон Босна и Херцеговина, нагласувајќи дека трајниот мир, безбедноста во земјата и стабилноста на Западен Балкан се од суштинско значење за безбедноста на евроатлантскиот простор.
Таа ги поздрави досегашните резултати од долгогодишното партнерство меѓу НАТО и БиХ, засновано на политички дијалог и практична соработка, како и засиленото присуство на Алијансата во Сараево.
Шеќеринска порача дека НАТО е подготвен дополнително да ја зајакне соработката со БиХ, врз основа на првата Индивидуално прилагодена партнерска програма, усвоена минатата година, оптимизираната имплементација на реформската програма и поддршката преку Програмата за градење одбранбени капацитети.
Таа нагласи дека сеопфатните реформи што ги спроведуваат властите во БиХ се клучни за НАТО поефикасно да ја обезбедува својата поддршка.
„НАТО веќе обезбедува силна поддршка за реформите, но нивниот целосен потенцијал може да се постигне само доколку биде проследен со кредибилен национален напор, вклучително и преку повисок буџет за Вооружените сили на Босна и Херцеговина“, порача Шеќеринска.
Таа додаде дека во денешниот „поопасен свет“ и сојузниците и партнерите на НАТО мора повеќе да инвестираат во сопствената одбрана и отпорност.
Шеќеринска повтори дека НАТО цврсто го поддржува територијалниот интегритет и суверенитетот на Босна и Херцеговина, како и европскиот и евроатлантскиот пат на земјата.
Ненадминливи Понуди Дневно
4.8 (10276 рецензии)
Заштедете 152.00 ден

