Генералниот секретар на Советот на Европа во Северна Македонија: во фокус односите со Бугарија и правата на заедниците

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Генералниот секретар на Советот на Европа во Северна Македонија: во фокус односите со Бугарија и правата на заедниците

06 мај 2026

• од Тодор Вангелов

Генералниот секретар на Советот на Европа, Ален Берсе, ќе престојува во официјална посета на Северна Македонија на 7 и 8 мај 2026 година. Посетата се очекува да биде фокусирана на соработката со институциите, владеењето на правото, човековите права, демократската отпорност и актуелните регионални прашања.

За време на престојот во Скопје, Берсе ќе оствари средби со највисоките државни претставници, меѓу кои и со претседателката Гордана Сиљановска-Давкова, првата жена шеф на државата во земјата и поранешна членка на Венецијанската комисија на Советот на Европа.

Тој ќе разговара и со премиерот Христијан Мицкоски, министерот за надворешни работи и надворешна трговија Тимчо Муцунски, министерот за правда Игор Филков и министерот за европски прашања Беким Сали. Во рамки на посетата се предвидени и средби со пратеници, вклучително и со делегацијата во Парламентарното собрание на Советот на Европа, како и со претставници на граѓанското општество.

Северна Македонија ќе пристапи кон Конвенцијата за вештачка интелигенција

Еден од централните моменти на посетата ќе биде церемонијата на потпишување на Рамковната конвенција на Советот на Европа за вештачка интелигенција и човекови права, демократија и владеење на правото. Потпишувањето е најавено за петок, 8 мај, и ќе ја означи заложбата на Северна Македонија технолошките иновации да се развиваат во согласност со основните права и демократските стандарди.

„Демократијата мора да им служи на луѓето во нивниот секојдневен живот. Тоа значи посилни институции, почитување на владеењето на правото и инклузивни општества во кои сите заедници се чувствуваат заштитени и слушнати“, изјави Берсе пред посетата.

Регионални и меѓународни прашања на агендата

На 7 мај, генералниот секретар Берсе ќе го отвори и меѓународниот собир „Водење промени: патишта насочени кон луѓето за демографска отпорност“, заедно со високи претставници на Обединетите нации. Конференцијата ќе ја нагласи важноста од инклузивни и долгорочни политики за справување со демографските предизвици и за зајакнување на демократската отпорност.

Посетата на Скопје ќе биде можност за разговори за клучни регионални и меѓународни прашања во Југоисточна Европа. Се очекува Берсе да ги охрабри продолжените напори за зајакнување на добрососедските односи, вклучително и со Бугарија, како и тековната работа, со поддршка на Советот на Европа, на Акциски план за унапредување на правата на лицата кои припаѓаат на заедниците.

Генералниот секретар ќе ја истакне и активната вклученост на Северна Македонија во правните инструменти на Советот на Европа, меѓу кои и потпишувањето на важни конвенции како Конвенцијата за заштита на професијата адвокат и Протоколот од Валета. Овие чекори, според Советот на Европа, ја потврдуваат посветеноста на земјата кон владеењето на правото и меѓународната соработка.

Во разговорите се очекува да биде нагласена и потребата од продолжување на реформите во правосудството, борбата против корупцијата и ефективното спроведување на пресудите на Европскиот суд за човекови права. Советот на Европа, како што се наведува, останува подготвен да ја поддржи Северна Македонија во овие процеси.