05 мај 2026
• од Тодор Вангелов
Претседателот на Венко Филипче и лидер на СДСМ, денеска на прес-конференција остро ја критикуваше економската политика на Владата, посочувајќи дека новиот бран на поскапувања на горивата претставува директен удар врз семејните буџети на граѓаните.
Според Филипче, и покрај претходните ветувања на премиерот Христијан Мицкоски за поевтини горива, реалноста покажува спротивен тренд.
„Од денеска повторно поскапеа горивата, иако премиерот ветуваше дека тоа нема да се случи. Тоа значи нов удар врз стандардот и дополнително покачување на цените“, изјави Филипче.
Тој нагласи дека Владата упорно одбива да ги прифати предложените мерки од СДСМ, кои, според него, би довеле до конкретно олеснување на економскиот притисок врз граѓаните. Како една од клучните мерки, Филипче го истакна укинувањето на ДДВ за храната, со цел да се намалат цените на основните производи.
„Храната значително поскапе, а со укинување на ДДВ-то може реално да поевтини. Наместо тоа, Владата не презема ништо“, додаде тој.
Филипче исто така посочи дека предложеното намалување на ДДВ за горивата на 5 проценти не било прифатено, како и дека не е реализирано ниту намалувањето на цените на патарините, мерка која, според него, би имала директен ефект врз трошоците на граѓаните и стопанството.
Во своето обраќање, лидерот на СДСМ ја критикуваше Владата и за недостиг на социјални мерки.
„Премиерот одбива да воведе било какви мерки за ранливите категории – пензионери, студенти, земјоделци. Истовремено, нема ниту зголемување на минималната плата“, рече Филипче.
Тој заклучи дека доколку предложените мерки биле навреме прифатени, растот на цените ќе бил значително ублажен, а животниот стандард на граѓаните подобро заштитен.
Ненадминливи Понуди Дневно
4.8 (10276 рецензии)
Заштедете 152.00 ден

