Полициски службеник зел 50 евра поткуп за побрзо да се изработи пасош, приведен е и се бара притвор

Откако жената го уплатила износот, се вратила во просториите на Одделот за управни работи и на осомничениот му ја предала уплатницата прашувајќи го за временскиот рок на постапката за издавање, на што тој одговорил дека се чека од 6 до 12 месеци. На тоа оштетената негодувала, а осомничениот со гестикулации, протривајќи ги прстите, ѝ покажал дека треба да плати 50 евра за услугата велејќи ѝ „знаете дека ние не се трудиме џабе”

Полициски службеник вчера е приведен поради сомнение дека примил поткуп, информираат од Основното јавно обвинителство (ОЈО) Скопје.

Кај осомничениот, како што велат од Обвинителството, при претрес била пронајдена банкнота од 50 евра која била крим-технички обработена, како и други парични средства и документација од други лица.

Во описот на случајот од Обвинителството велат дека осомничениот што бил вработен во Отсекот за странци и реадмисија, на 16.1.2025 година во службените простории ја повикал оштетената која ја изгубила патната исправа и требало да извади нова.

Притоа, осомничениот без да изврши проверки за претходно изгубениот пријавен пасош и да ги запази работните процедури ѝ дал уплатница на оштетената за да уплати за издавање нов.

Откако таа го уплатила износот, оштетената се вратила во просториите на Одделот за управни работи и на осомничениот му ја предала уплатницата прашувајќи го за временскиот рок на постапката за издавање, на што тој одговорил дека се чека од 6 до 12 месеци. На тоа оштетената негодувала, а осомничениот со гестикулации, протривајќи ги прстите, ѝ покажал дека треба да плати 50 евра за услугата велејќи ѝ „знаете дека ние не се трудиме џабе”.

„Оштетената кажала дека нема пари во себе и ако не е проблем да ја почека да земе, а ако не стаса во текот на денот да му ги предаде наредниот ден, на што осомничениот се согласил и рекол дека ќе ја чека за да ја заврши работата“,

се вели во описот од Обвинителството.

Откако жената излегла од зградата, била свесна дека тоа што осомничениот ѝ побарал пари без да ги уплати на сметка за побрзо да ја добие патната исправа е кривично дело, случајот го пријавила во полициска станица.

„Жената во текот на вчерашниот ден му ја предала крим-технички обработената банкнота на осомничениот која била пронајдена при претресот“,

додаваат од Обвинителство.

Оттаму велат дека предметниот јавен обвинител донел наредба за спроведување истражна постапка против осомничениот, а од судијата на претходна постапка при Основниот кривичен суд Скопје се бара на осомничениот да му се изрече мерка притвор во траење од 30 дена.

Вчерашната акција, како што додаваат од Обвинителството, била под раководство на надлежен јавен обвинител од Специјализираното одделение за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција, а по претходно обезбедена наредба од судија на претходна постапка од Основниот кривичен суд Скопје за претрес на службени простории и лице.