Денеска го празнуваме Преподобен Даниил Столпник

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

ДРУГО

Денеска го празнуваме Преподобен Даниил Столпник

24 декември 2025

• од Станча Јаќимовски

Православната црква денеска го одбележува споменот на Преподобен Даниил Столпник, еден од најголемите подвижници и светители на V век, кој се празнува на 11 декември по стар, односно на 24 декември по нов стил.

Преподобен Даниил е роден во селото Витара, во близина на градот Самосат во Месопотамија, од побожни христијански родители – Илија и Марта. Како дете измолено од Бога, роден по долгогодишна бездетност, тој уште од најрана возраст бил посветен на служба на Бога. На само дванаесет години го примил монашкиот чин, а во својата младост го посетил и прочуениот свети Симеон Столпник, од кого добил благослов за својот подвижнички пат.

Воден од желбата за целосна самотија и духовно совршенство, Даниил го напуштил манастирот и се повлекол во напуштен идолски храм на брегот на Црното Море. Таму претрпел многубројни напади од демоните, но со трпение, постојана молитва и силата на знакот на Крстот, ги надминал сите искушенија.

Подоцна се искачил на столб – подвиг по кој останал запаметен во црковната историја – и на него останал до крајот на својот живот. Поднесувајќи ги подеднакво жештината и студот, како и нападите од луѓето и од демоните, тој со својот живот сведочел за крајната посветеност на Бога.

Околу неговиот столб постепено се собрале бројни ученици, а со својот личен пример и духовни поуки, Преподобен Даниил ги водел кон живот во светост. Бог го дарувал со голема благодат на чудотворство уште за време на неговиот земен живот, а бил познат и како прозорливец на идните настани.

Под неговиот столб постојано притекнувал народ од сите страни, барајќи утеха, исцеление и духовен совет. Кај него доаѓале и цареви, и патријарси, и обични луѓе. Царот Лав Велики, кога примал странски државници, често ги водел под столбот на свети Даниил и со гордост велел: „Ете го чудото во моето царство!“

Преподобен Даниил однапред го прорекол денот на својата смрт, ги поучил своите ученици и мирно се простил од нив. Пред неговото упокојување, учениците сведочеле за чудесно видение – над столбот се појавиле ангели, пророци, апостоли и маченици.

Овој ангелски човек поживеал осумдесет години и се упокоил во Господа во 489 година, оставајќи зад себе свет пример на вера, трпение и целосна предаденост на Бога.