Денес 25 февруари 2026 година се празнува: Свети Мелетиј, архиепископ Антиохиски

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

ДРУГО

Денес 25 февруари 2026 година се празнува: Свети Мелетиј, архиепископ Антиохиски

25 февруари 2026

• од Станча Јаќимовски

Денес Црквата го празнува споменот на Свети Мелетиј Антиохиски, голем архипастир, богослов и непоколеблив бранител на православната вера во 4 век. Неговиот живот и служба се одбележани со истрајна борба против ариевата ерес, која го негирала божеството на Синот Божји и ја хулела тајната на Пресвета Троица.

Борец против ариевството

Свети Мелетиј бил извонреден толкувач на православното учење и ревносен заштитник на догмата за единосуштноста на Отецот и Синот. Поради својата цврста исповед на верата, еретиците трипати го симнувале од архиепископскиот престол и го испраќале во прогонство во Ерменија.

Борбата меѓу православните и ариевците во Антиохија достигнувала крајна жестина. Во една прилика, додека свети Мелетиј во храм проповедал за единството на Света Троица, негов сопствен ѓакон, кој бил наклонет кон ереста, притрчал и му ја затворил устата со рака за да го спречи да зборува.

Но светителот не замолкнал. Наместо со зборови, тој продолжил да сведочи со знаци: ја подигнал раката, ги покажал трите прсти раздвоено – како символ на трите Лица на Троицата – а потоа ги соединил во едно, означувајќи го нивното суштинско единство. Така, и без збор, ја исповедал православната вера.

Вториот Вселенски Собор и чудото

Свети Мелетиј учествувал на Вториот Вселенски Собор, свикан во Цариград во 381 година, каде што уживал голема почит од царот Теодосиј I Велики.

На овој Собор, при докажувањето на догмата за Света Троица пред ариевците, Бог пројавил чудо преку него. Кога свети Мелетиј повторно ги подигнал трите прсти, раздвоено, а потоа ги соединил во едно, од неговата рака блеснала светлина како молња пред очите на присутните. Овој настан бил сфатен како небесна потврда на православното исповедање.

На истиот Собор, свети Мелетиј го утврдил на цариградскиот престол големиот богослов Григориј Богослов, со што придонел за зацврстување на православието во престолнината.

Учител на големи светители

Неговото духовно наследство се гледа и во личностите што ги вовел во црковната служба. Тој го ракоположил за ѓакон свети Василиј Велики, а го крстил идниот голем архиепископ и проповедник Јован Златоуст.

Со тоа, свети Мелетиј стои во духовната лоза на некои од најзначајните столбови на православната теологија и пастирство.

Блажена кончина и наследство

По завршувањето на Вториот Вселенски Собор, свети Мелетиј го завршил својот земен живот во Цариград. Неговите свети мошти подоцна биле пренесени во Антиохија, каде што останале како сведоштво за неговата вера, страдање и архипастирска љубов.

Свети Мелетиј Антиохиски останува пример за архиереј кој не се поколебал пред притисоци, прогонства и понижувања, туку со збор, дело и чудо ја исповедал вистината за Света Троица. Неговиот живот е потсетник дека вистинската вера се брани со храброст, трпение и непоколеблива верност кон Христовото учење.