Нема веќе дивеење: На електричен тротинет само со над 18 години, без сопатник и трезен

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Нема веќе дивеење: На електричен тротинет само со над 18 години, без сопатник и трезен – Собранието ги донесе законските измени

30 јуни 2026

• од Темелко Тошев

Собранието стави крај на сообраќајниот хаос поврзан со „лесните електрични возила“. На денешното продолжение од 106-тата седница, пратениците едногласно ги изгласаа измените на Законот за безбедност на сообраќајот на патиштата, со кои драстично се заоструваат правилата за управување со електрични тротинети.

Измените беа донесени со двојно мнозинство, односно со поддршка од сите 64 присутни пратеници, вклучувајќи ги и потребните 17 гласа „за“ според Бадентеровиот принцип.

Што се менува со новиот Закон?

Со цел да се заштитат животите на сите учесници во сообраќајот, а следејќи ги препораките на Европската Унија, новите законски одредби носат неколку клучни ограничувања:

Забрана за малолетници: Се воведува минимална старосна граница од 18 години. На лицата под оваа возраст целосно им се забранува управувањето со електричен тротинет.
Намалена брзина: Максималната дозволена брзина се ограничува на 20 километри на час (наместо досегашните 25 км/ч).
Без сопатници: Строго е забрането превезување на други лица за време на управувањето со возилото.
Нулта толеранција за алкохол: Возачот не смее да управува со тротинетот доколку во организмот има алкохол или ако покажува знаци на алкохолна растроеност.
Забрана за акробации: Возачите не смеат да ги симнуваат рацете од управувачот, да се придржуваат за друго возило, да возат на едно тркало, ниту пак да влечат или туркаат предмети.

Строги казни: Кога полицијата ќе ви го одземе тротинетот?

Казнената политика за прекршителите е значително заострена. Покрај паричните глоби, Законот сега предвидува и одземање на возилото во следните конкретни случаи:

Ако електричниот тротинет го управува малолетно лице (под 18 години).
Доколку е пречекорена максимално дозволената брзина од 20 км/ч.
Ако на тротинетот се превезува повеќе од едно лице (сопатник).
При возење под дејство на алкохол.

Алармантни бројки: Десетици загинати и стотици повредени

Иницијативата за регулирање на тротинетите првично ја најави министерот за внатрешни работи, Панче Тошковски, во средината на мај, откако зачестија незгодите во кои страдаа малолетници.

Предлог-измените беа поднесени по скратена постапка од група пратеници од владејачкото мнозинство. Координаторот на пратеничката група на ВМРО-ДПМНЕ, Никола Мицески, при образложувањето на Законот посочи дека статистиката на МВР е загрижувачка.

„Бројките се алармантни – десетици загинати и стотици тешко повредени во сообраќајни незгоди во изминатите две години. Целта не е казнување, туку заштита на животите, особено на младите. Безбедноста нема цена. Повеќе ред на улиците значи помалку несреќи и посигурна иднина за сите учесници во сообраќајот“, истакна Мицески.

Анализите на Министерството за внатрешни работи покажале дека во повеќе од половина од несреќите во кои учествувале електрични тротинети, тие биле управувани од лица на 16 и 17-годишна возраст, што беше и главната причина за целосна забрана за малолетници.

Законодавците оставаат простор за дополнителни измени во иднина, во зависност од анализите и ефектите што овој Закон ќе ги покаже во пракса.