Зеленски: Украина нема да ги признае окупираните територии – тоа е црвената линија за нас
Украинскиот претседател Володимир Зеленски јасно истакна дека Украина нема да прифати никакво признавање на териториите окупирани од Русија, нарекувајќи го тоа една од најважните „црвени линии“ за земјата. Изјавата доаѓа во пресрет на најавените мировни разговори за ставање крај на војната.
На средбата со лидерите на територијалните заедници во Чернихив, Зеленски беше дециден: „Наш приоритет е нашата силна армија. Значи, ова е црвена линија за нас – нема намалување на бројот на нашата армија. Да бидам искрен, ќе направиме се за да ја задржиме армијата во состојбата во која е денес. Голема армија, три пати поголема отколку што беше на почетокот на војната.“
Покрај безбедносниот аспект, претседателот подвлече дека Украина нема да отстапи ниту еден пед земја: „Непризнавањето на какви било територии окупирани од Русија е друго клучно геополитичко прашање. Тоа се украински територии, ова е една од најважните црвени линии за нас. Во секој случај, тоа се привремено окупирани територии.“
Зеленски заклучи дека праведен мир ќе биде можен само кога сите територии ќе бидат вратени под украинска контрола. Овие изјави го нагласуваат непопустливиот став на Киев во однос на суверенитетот и територијалниот интегритет на земјата, како и неговата решеност да ја зачува и зајакне украинската одбрана.