17 декември 2025
• од Станча Јаќимовски
Украинскиот претседател Володимир Зеленски изјави дека Русија мора да биде повикана на одговорност за „злосторството агресија“ и дека не е доволно таа само да биде принудена да прифати мировен договор. Изјавата ја даде во Хаг, пред почетокот на конференција за формирање Меѓународна комисија за побарувања за Украина, која ќе ги верификува барањата за воени штети што Русија ќе мора да ги надомести, пренесува „Ројтерс“.
Во обраќање пред холандскиот парламент, Зеленски нагласи дека Русија мора да ја прифати реалноста дека во светот постојат правила и дека не може бесконечно да избегнува одговорност. Според него, „тешко е да се најде злосторство против човештвото што Русија не го извршила“.
Украинскиот лидер истакна дека Киев учествува во „најинтензивните и најфокусирани“ мировни преговори од почетокот на војната во 2022 година. Сепак, тој ги повика Холандија и другите европски сојузници да не ја „наградуваат“ Русија во евентуален мировен договор, предупредувајќи дека „секој детал е од клучно значење“.
Зеленски остро ги критикуваше руските барања Украина да се откаже од делови од својата територија, вклучително и од области што руските сили не успеале целосно да ги освојат, оценувајќи дека тоа претставува директно ограничување на украинскиот суверенитет.
„Русија има речиси еден милион окупациски војници на наша територија, а сепак бара Украина да прифати ограничувања на правото да се приклучува кон сојузи и ограничувања на сопствениот суверенитет“, истакна тој.
Претседателот потсети и на постојаните напади врз украинскиот енергетски сектор од страна на руските сили, додавајќи дека Москва дури и за тие напади ја обвинува Украина. „Кога ние возвраќаме, тие реагираат како само тие да имаат право да напаѓаат, а другите да молчат и да страдаат. Тоа е Русија“, рече Зеленски.
Тој оцени дека Русија се однесува како криминалец кој е убеден дека никогаш нема да биде фатен. „Русија се чувствува загрозена кога нејзините соседи се безбедни и се чувствува лошо кога тие напредуваат. Не е доволно да ја принудиме Русија да се согласи, ниту само да престане да убива. Мора да ја принудиме да прифати дека постојат правила во овој свет и дека не може да ги измами сите. Тоа е патот кон траен мир“, заклучи Зеленски.
ОЈО Скопје отвори предмет за „Зимзоленд“: Се испитува можна општа опасност
Ненадминливи Понуди Дневно
4.8 (10276 рецензии)
Заштедете 152.00 ден

