Шекеринска: Нормализацијата меѓу Србија и Косово е клучна за безбедноста на Балканот

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Шекеринска: Нормализацијата меѓу Србија и Косово е клучна за безбедноста на Балканот

24 декември 2025

• од Станча Јаќимовски

Недостатокот на политичка волја во Белград и Приштина за конструктивно учество во процесот на нормализација е сериозно загрижувачки и претставува клучна пречка за стабилноста и безбедноста на целиот Западен Балкан. Ова го истакна заменик-генералната секретарка на НАТО, Радмила Шекеринска, во интервју за порталот „Косово онлајн“.

Според Шекеринска, Западен Балкан останува регион од стратешко значење за НАТО, а стабилноста на Европа е неразделно поврзана со стабилен Балкан. Таа нагласи дека Алијансата нема да дозволи создавање безбедносен вакуум и дека нејзината посветеност кон регионот е непоколеблива.

„Гледаме загрижувачки трендови – сецесионистички закани во Босна и Херцеговина, кревка безбедносна ситуација во Косово и недоволна подготвеност на Белград и Приштина конструктивно да се вклучат во дијалогот за нормализација“, изјави Шекеринска, додавајќи дека авторитарни режими, како Русија, се обидуваат да ги искористат внатрешните слабости во регионот преку дезинформации, сајбер закани и други форми на малигно влијание.

КФОР – клучен столб на безбедноста

Во однос на безбедносната состојба во Косово, Шекеринска ја оцени улогата на КФОР како фундаментална. Таа потсети дека станува збор за најдолгата и моментално најголемата мисија во историјата на НАТО, која работи во согласност со Резолуцијата 1244 на Советот за безбедност на ОН.

По насилствата во 2023 година, НАТО распореди дополнителни 1.000 војници и го зголеми присуството во северно Косово, што претставува најголемо засилување на мисијата во последната деценија. КФОР, како што нагласи таа, има видливо и флексибилно присуство и е подготвен да одговори на секој безбедносен предизвик.

„Ситуацијата е мирна, но сè уште кревка. Затоа не смееме да бидеме самозадоволни“, истакна Шекеринска.

Дијалогот е единствениот пат

НАТО, според неа, силно го поддржува дијалогот меѓу Белград и Приштина, посредуван од Европската Унија, како единствена рамка за трајно решавање на отворените прашања. Таа ги повика двете страни да учествуваат со добра волја и да ги спроведат веќе постигнатите договори.

„Дипломатијата мора да има предност пред насилството. Политичкото водство и храброста за компромис се неопходни за напредок“, нагласи таа.

НАТО и евроатлантските аспирации на Косово

Осврнувајќи се на стремежите на Косово за членство во НАТО, Шекеринска истакна дека таквиот процес бара консензус меѓу сите земји-членки и дека напредокот во нормализацијата на односите со Србија ќе биде одлучувачки фактор.

„Ги охрабруваме институциите во Косово да покажат флексибилност и напредок во дијалогот со Србија. Тоа ќе биде клучно за секој чекор кон евроатлантските аспирации и за долгорочната безбедност на регионот“, порача таа.

Србија – партнер со важна улога

Шекеринска нагласи дека НАТО ја почитува политиката на воена неутралност на Србија и дека соработката меѓу двете страни е широка и долгорочна. Сепак, таа потенцира дека Алијансата смета на Србија да игра конструктивна улога во регионот и со добра волја да се вклучи во дијалогот со Приштина.

„Поголема стабилност значи поголем просперитет за Србија и поголема безбедност за целиот Западен Балкан“, заклучи заменик-генералната секретарка на НАТО.