05 август 2025
• од Станча Јаќимовски
Само секој шести граѓанин на Германија би бил подготвен да се бори за својата земја во случај на воен конфликт. Според истражувањето на германскиот институт „Форса“, само 16% од анкетираните изјавиле дека категорично би се пријавиле на фронтот, додека дополнителни 22% веројатно би се вклучиле во воени дејствија.
Истражувањето, спроведено на 28 и 29 јули, е реализирано во контекст на засилените дебати во Германија околу способноста и подготвеноста на земјата за самоодбрана. Во анкетата учествувале 1000 испитаници.
Загрижувачки е податокот дека дури 59% од Германците не се подготвени да ја бранат Германија со оружје во случај на напад. Кај жените, оваа бројка е уште повисока — 72% не би земале оружје во рака.
Интересно е што 27% од испитаниците веруваат дека Германија би можела да биде нападната во следните пет години. Од друга страна, 59% сметаат дека во тој период земјата ќе биде принудена да обезбеди воена поддршка на друга членка на НАТО, согласно обврските за заемна одбрана.
Овие податоци отвораат сериозни прашања за односот на граѓаните кон националната безбедност и нивната подготвеност за директно учество во воени конфликти.