Уапсен припадник на обезбедувањето на премиерот Мицкоски за продажба на службени тајни за 50.000 евра

Јавен обвинител од Специјализираното одделение за гонење на кривични дела сторени од лица со полициски овластувања и припадници на затворска полиција при ОЈО ГОКК отвори истражна постапка против самостоен инспектор, член на единицата за лично обезбедување на премиерот Христијан Мицкоски, поради сомнение за оддавање службена тајна од користољубие.

Според информациите од обвинителството, полицаецот кој до вчера бил дел од Шестата управа при Министерството за внатрешни работи, се сретнал со друго лице на паркинг пред хотел во Велес, на 30 март 2025 година. Таму му покажал и објаснувал службени документи од МВР кои претставуваат службена тајна, дозволувајќи му на сведокот да ги снима документите со цел тие да бидат објавени на социјалните мрежи. За ова, осомничениот очекувал да добие сума од 50.000 евра од лицето за кое се однесувале документите.

Обвинителството утврдило дека постојат основи за сомнение дека осомничениот го сторил кривичното дело – оддавање службена тајна, за кое е предвидена казна затвор од една до 20 години. Судија на претходна постапка при Основниот кривичен суд Скопје прифати предлог за определување притвор во траење од 30 дена, поради опасност од бегство, влијание врз сведоци и повторување на делото.

Од Основното јавно обвинителство за гонење на организиран криминал и корупција потенцираат дека во овој случај ниту осомничениот, ниту документите не се поврзани со криминалната група од Грчец, како што претходно беа објавиле некои медиуми.

Директорот на затворот Скопје, Бобан Утковски, потврди дека осомничениот се наоѓа во притвор. Овој случај фрла сенка врз безбедносниот систем и отвора сериозни прашања за безбедноста и интегритетот на институциите задолжени за заштита на највисоките државни функционери.