Тројца полицајци упаднале во дом и влечеле скопјанец пред детето!
Министерството за внатрешни работи поднесе кривична пријава против тројца полицајци од Полициската станица Аеродром – М.Т., С.Р. и Ф.Ѓ., поради сомневање дека извршиле сериозни злоупотреби при службено постапување, меѓу кои и насилно влегување во приватен дом и малтретирање на граѓанин.
Инцидентот се случил на 24 февруари 2025 година во Скопје, кога првоосомничениот М.Т. и второосомничениот С.Р. се појавиле пред влезот на станот на оштетениот, наведувајќи дека дошле за службен разговор поради поплака поднесена од неговата сопруга. Сепак, кога граѓанинот одбил да ги пушти внатре бидејќи не поседувале судски налог, ситуацијата ескалирала.
Според информациите од МВР, М.Т. неовластено влегол во домот, физички го нападнал оштетениот, го удирал по ногата и се обидел да го приведе – сето тоа пред очите на неговиот малолетен син. Со овие дејства, полицаецот е осомничен за две кривични дела: „малтретирање во вршење на службата“ (член 143 од Кривичниот законик) и „нарушување на неповредливоста на домот“ (член 145 став 2).
Истото кривично дело за нарушување на неповредливоста на домот им се става на товар и на С.Р. и на третоосомничениот Ф.Ѓ., кои, според пријавата, му помогнале во нелегалниот упад.
Од МВР исто така соопштија дека против тројцата полициски службеници е покрената дисциплинска постапка за утврдување одговорност за прекршување на работната дисциплина, при што се суспендирани од работните места до завршување на истрагата.
Овој случај повторно го отвора прашањето за почитување на човековите права при службено постапување и ја става во фокусот потребата од строго придржување до законските процедури и етичките стандарди од страна на припадниците на полицијата.