Судењето за трагедијата во дискотеката „Пулс“ продолжува на 2 декември

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Судењето за трагедијата во дискотеката „Пулс“ продолжува на 2 декември

25 ноември 2025

• од Станча Јаќимовски

Судењето за катастрофалниот пожар во дискотеката „Пулс“ во Кочани, во кој на 16 март 2025 година загинаа 63 лица, а над 200 беа повредени, ќе продолжи на 2 декември. Денешното рочиште беше искористено за изјаснување на дел од оштетените и нивните законски застапници, кои пред Судот изјавија дека се приклучуваат кон кривичниот прогон и дека надомест на штета ќе бараат во граѓанска постапка.

Отповикано рочиште и задолжение за повикување на останатите оштетени

Судијката Диана Груевска Илиевска информираше дека за утрешниот ден планираното рочиште се отповикува, бидејќи не биле обезбедени точни адреси за сите оштетени и нивните застапници.

„Потребно е да бидат повикани и останатите оштетени за да можат да се произнесат за кривичниот прогон и оштетните побарувања“, изјави судијката, нагласувајќи дека интегрираниот текст на обвинението и доказите ќе им биде доставен и на дел од бранителите кои досега не ги добиле.

Реакции на одбраната и одложување на постапката

Пред почетокот на рочиштето, дел од бранителите реагираа дека не го добиле изменетото обвинение, иако од нив се очекувало да дадат воведни зборови. Поради тоа, Судот направи пауза за да процени како ќе продолжи расправата.

Судијката потврди дека дел од приговорите се основани:

„Обвинението интегрирано со листата на докази не беше доставено до обвинетите. Бидејќи бранителите не прифаќаат доставата да се изврши преку нив, Судот денес и утре ќе ја доставува документацијата до сите обвинети“, рече Груевска Илиевска.

Судот: Нема ново обвинение, нема промена на фактите

Одбраната истакна забелешки и за наводно изменето обвинение, но Судот оцени дека не се работи за нов документ:

„Не се воведени нови дејствија, обвинети, оштетени, ниту има промени во фактичката состојба. Не станува збор за нова правна квалификација“, укажа судијката.

Поради избегнување на дополнително одолговлекување, Судот одлучи расправата денес да продолжи само во делот на изјаснувањето на присутните оштетени и нивните застапници.

Одбраната: Доказите се несредени

Бранителите на дел од обвинетите дополнително реагираа и на, како што велат, хаотичната состојба на доказниот материјал. Тие побараа целосна и уредно сортирана документација.

Судењето се одвива под засилени безбедносни мерки, а во судницата присуствуваат роднини на жртвите, претставници на обвинителството, одбраната, како и домашни и странски новинари.

Обвинението: систематска негрижа и незаконско работење

Според обвинителството, трагедијата е резултат на долгогодишно игнорирање на безбедносните ризици. „Пулс“ работел без основни противпожарни системи, со само еден излез, со затворени прозорци и со лесно запаливи материјали во ентериерот. Во критичната вечер бил дозволен неконтролиран влез на повеќе од 600 гости, меѓу кои и малолетници, а пиротехнички средства биле користени без дозвола.

Особено опасен бил токсичниот сунѓер на плафонот, кој при согорување ослободувал смртоносни гасови, што во услови на недоволни излези довело до масовно задушување и паника.

37 обвинети: сопственици, инспектори, градоначалници, полицајци…

Осум месеци по трагедијата, на обвинителна клупа седнаа 37 обвинети — 34 физички и три правни лица. Меѓу обвинетите се сопственици на локали, управители, членови на обезбедување, инспектори, државни службеници и поранешни градоначалници. Обвинети се и три фирми: „ММММ Кафе“ ДООЕЛ Кочани, „Рубикон Секјурити Солушнс“ и „Венци Проект“ ДООЕЛ Кочани.

Судењето продолжува на 2 декември, кога се очекува да се произнесат и преостанатите оштетени.