ССМ предупредува: Државата на чекор до генерален штрајк поради ниските плати

Со порака за солидарност и решителност, Сојузот на синдикати на Македонија (ССМ) одржа протест во Скопје, повикувајќи на зголемување на минималната и останатите плати. Настанот започна со минута молк во чест на загинатите во трагедијата во кочанската дискотека, по што синдикалците се упатија кон Собранието, Стопанската комора и Владата.

Главно барање на синдикатите е минималната плата да изнесува 500 евра, а сите останати плати да се зголемат за 100 евра. Претседателот на ССМ, Слободан Трендафилов, упати остри критики до пратениците:

„Да си ги намалите вашите луксузни пратенички плати на минимална плата, се додека не ги зголемите работничките плати.“

Протестот продолжи пред Стопанската комора, каде беше упатена порака до работодавачите за итно зголемување на платите. Синдикатите алармираа дека секоја година околу 10.000 млади ја напуштаат земјата во потрага по подобра иднина.

„Зголемете ги платите затоа што немаме резервна држава. Ќе си одите вие од Македонија, не ние“, порача Иван Пешевски од СГИП.
„Верувајте, младиот работник за 500 евра не сака ни да помириса компанија“, додаде Игор Герасов од СИЕР.

Протестот заврши пред Владата, каде синдикалците ја нарекоа незаконска одлуката за минимална плата од 24.400 денари, бидејќи, како што велат, не била донесена во консултација со нив.

„На чекор сме до генерален штрајк во целата држава. Работникот ве бира и може многу лесно да ве симне од фотелја“, предупреди Трендафилов.

Трпе Деаноски од УПОЗ, пак, истакна дека 98% од вработените во управата и правосудството примаат плати под просекот, со симболично зголемување од само 1.890 денари.

Од Владата, министерот за економија и труд Бесар Дурмиши ја бранеше одлуката, велејќи дека постапиле согласно законот и дека немало мислење од Економско-социјалниот совет бидејќи синдикатите сè уште немаат репрезентативност.

„Ако не ја објавевме до 31 март, ќе се блокираше целата држава“, изјави Дурмиши.

Лидерот на СДСМ, Венко Филипче, изрази поддршка за барањата на работниците, но потенцираше дека протестите не се организирани од партијата.

„Тоа се автентични протести на работниците. Ние излеговме со предлози, но Владата не ги прифати.“

Според податоците на УЈП, во земјата има околу 20.000 работници кои земаат минимална плата. Синдикатите најавија дека, доколку не се исполнат нивните барања, следниот чекор ќе биде генерален штрајк низ целата држава.