Шекеринска и Соренсен: Соработката меѓу НАТО и ЕУ е клучна за стабилноста на Западен Балкан
Заменик генералниот секретар на НАТО, Радмила Шекеринска, синоќа се сретна со специјалниот претставник на Европската Унија за дијалогот меѓу Белград и Приштина, Петер Соренсен. На средбата, Шекеринска истакна дека континуираната соработка помеѓу НАТО и ЕУ е од суштинско значење за зачувување на стабилноста во регионот на Западен Балкан.
„Одлично е што се сретнав со Петер Соренсен, специјалниот пратеник на ЕУ за дијалогот меѓу Белград и Приштина. Континуираната соработка меѓу НАТО и ЕУ е клучна за зачувување на стабилноста во регионот на Западен Балкан“, напиша Шекеринска на социјалната мрежа Х.
На објавата реагираше и самиот Соренсен, кој ѝ се заблагодари на Шекеринска за средбата и додаде дека се радува на идната блиска соработка.
Инаку, оваа средба доаѓа во период кога Соренсен го интензивира својот дипломатски ангажман во регионот. Минатата недела тој ја оствари својата прва официјална посета на Белград откако ја презеде новата функција, а претходно престојуваше и во тридневна посета на Косово.
Овие дипломатски активности укажуваат на засилен ангажман на ЕУ и НАТО во поддршка на дијалогот меѓу Белград и Приштина, како и на пошироките напори за одржување на мирот и стабилноста на Западен Балкан.