29 јули 2025
• од Станча Јаќимовски
Денеска во Собранието на Република Северна Македонија пред пратениците ќе се најдат измените и дополнувањата на Законот за внатрешни работи и Законот за полиција. Иако власта ги претставува како дел од обидот за поефикасна реорганизација на полицијата, дел од предложените измени предизвикуваат сериозна загриженост и остри реакции во јавноста.
Најконтроверзна и најспорна е одлуката за целосно бришење на членот 19 од Законот за полиција, кој досега предвидуваше автоматски престанок на работниот однос за полициски службеници кои се правосилно осудени за кривични дела или имаат забрани за вршење на одредена дејност подолга од шест месеци.
Според важечката верзија на законот, доколку полицаец биде осуден на затворска казна подолга од шест месеци или му биде изречена забрана за извршување на полициски работи, му престанува работниот однос со денот на врачувањето на пресудата. Оваа мерка ја спроведува министерот за внатрешни работи со формално решение.
Со новите измени, овој член се брише без да се понуди соодветна замена или нова регулатива која би ги регулирала овие случаи. Во пракса, тоа значи дека дури и полициски службеник кој е правосилно осуден за кривично дело, по издржување на казната ќе може да се врати на работа во полицијата, што отвора сериозни прашања за кредибилитетот и етиката во системот.
Овој чекор се оценува како сериозен преседан и се толкува како обид за разлабавување на критериумите за дисциплинска и кривична одговорност во полицијата. Јавноста и дел од стручната фела бараат итно повлекување на оваа измена и отворање на широка дебата за последиците што ваквата законска празнина може да ги предизвика.
Во време кога довербата во институциите е нарушена, вакви измени не само што ја подриваат правната сигурност, туку и го компромитираат угледот на полицијата како орган задолжен за спроведување на законот.
Ненадминливи Понуди Дневно
4.8 (10276 рецензии)
Заштедете 152.00 ден