СДСМ поднесе предлог-закон за минимална плата од 600 евра, синдикатите протестираат

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

СДСМ поднесе предлог-закон за минимална плата од 600 евра, синдикатите протестираат

30 јануари 2026

• од Гоце Кически

Пратеничката група на СДСМ денеска во Собрание на Република Северна Македонија поднесе Предлог-закон за изменување и дополнување на Законот за минимална плата, со кој се предлага минималната плата да изнесува 36.960 денари, односно 600 евра.

Предлогот доаѓа во период на зголемено социјално незадоволство и протести организирани од Сојузот на синдикатите на Македонија, кои подолг период бараат значително зголемување на минималната плата поради растечките трошоци за живот.

Во образложението на законското решение, од СДСМ наведуваат дека во текот на 2025 година е евидентиран континуиран пораст на инфлацијата, при што индексот на трошоците на живот бележи значително зголемување. Најголем удар, според партијата, имаат поскапувањата на основните прехранбени производи, енергенсите, комуналните услуги и здравствените трошоци, кои директно влијаат врз месечниот буџет на домаќинствата.

„Поскапувањата кај храната и основните животни намирници, како и растот на цените на електричната енергија, греењето и услугите, реално ја намалуваат куповната моќ на работниците, особено на оние кои примаат минимална плата“, се наведува во соопштението.

Од опозициската партија посочуваат дека ваквата состојба најсилно ги погодува најранливите категории на работници, за кои минималната плата е единствен или доминантен извор на приходи. Тие потсетуваат дека синдикатите, како легитимни претставници на работниците, континуирано укажуваат на потребата од дополнително зголемување на минималната плата со цел ублажување на инфлациските притисоци и обезбедување достоинствен животен стандард.

Финансиските импликации од предложените законски измени се проценуваат на околу 7,5 милијарди денари.

„СДСМ е на страна на работниците. Очекуваме поддршка од сите парламентарни партии“, порачуваат од партијата, апелирајќи за поширок политички консензус околу, како што велат, обезбедување достоинствена плата и поголема социјална сигурност.

Во меѓувреме, од синдикатите најавуваат дека протестите ќе продолжат сѐ додека не се прифати решение што ќе одговори на реалните трошоци за живот и ќе обезбеди фер вреднување на трудот.