Рокас: Медиумската писменост е европскиот штит против дезинформациите

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Рокас: Медиумската писменост е европскиот штит против дезинформациите

18 ноември 2025

• од Станча Јаќимовски

Од денес до 24 ноември, во организација на Мрежата за медиумска писменост, по седми пат се одржуваат Деновите на медиумската писменост 2025. Членовите на Мрежата и нивните поддржувачи ќе реализираат повеќе од дваесет настани на различни локации низ државата, а дел од активностите ќе се одвиваат и онлајн. На овој начин земјата се приклучува кон Глобалната недела на медиумска и информациска писменост на УНЕСКО.

„Ти знаеш, другиот не знае“ – критичкото размислување во фокусот

На денешната Конференција за медиумска писменост 2025 под мотото „ЕУ – Западен Балкан“, во организација на Делегацијата на Европската Унија, директорот на Агенцијата за аудио и аудиовизуелни медиумски услуги (АВМУ), Зоран Трајчевски, нагласи дека овогодинешните активности се насочени кон охрабрување на критичкото размислување и поттикнување одговорно однесување во дигиталниот простор.

„Денес, повеќе од кога било, не е доволно само да ги препознаеме дезинформациите – потребно е да реагираме, да споделуваме знаење и да бидеме активни граѓани“, истакна Трајчевски.

Од АВМУ информираат дека конференцијата претставува клучен регионален настан на Европската служба за надворешни работи во областа на медиумската писменост, а годинава токму конференцијата во Скопје го означува и официјалниот почеток на Деновите на медиумската писменост.

Амбасадорот Рокас: Медиумската писменост е заштита на демократијата

Амбасадорот на ЕУ во земјата, Н.Е. Михаилис Рокас, укажа на значењето на медиумската писменост во време кога социјалните мрежи, вештачката интелигенција и странските манипулативни влијанија ја менуваат начинот на кој граѓаните доаѓаат до информации.

„Медиумската писменост е едно од најсилните средства што ги имаме за да ги заштитиме нашите општества. Кога луѓето умеат да препознаат лажна содржина, критички да ги преиспитуваат информациите и да бараат доверливи извори, тие стануваат активни чувари на демократијата“, нагласи Рокас.
Тој додаде дека ова е една од основните идеи зад иницијативата на ЕУ – „Европски штит за демократијата“, која има за цел да ја зајакне заедничката отпорност на манипулативни информации и дезинформации.

Главните теми на конференцијата

Конференцијата се фокусира на повеќе актуелни теми, меѓу кои:

улогата на социјалните мрежи како дел од проблемот, но и од решението во справување со манипулациите;
родовите дезинформации и дигиталната омраза;
значењето на институционалниот одговор кон надворешните манипулации и дезинформации;
вештачката интелигенција и предизвиците поврзани со вистинитоста и дигиталниот суверенитет;
младите генерации и платформите – навигација низ ризици и можности.

Видео и аудио материјали за поширока информираност

За потребите на Деновите на медиумска писменост 2025 се подготвени видео и аудио клипови на македонски, албански и англиски јазик, кои веќе се емитуваат во медиумите со цел да информираат што поголем број граѓани. Оваа година промотивните видеа ќе бидат поставени и на видеобими на повеќе локации во Скопје.

Каде да се следат настаните?

Повеќе информации за настаните – во живо или онлајн – како и за медиумските содржини што ќе се емитуваат во рамките на Деновите, може да се најдат на веб-страниците mediumskapismenost.mk и avmu.mk, како и на Facebook, Instagram и YouTube каналите на Мрежата за медиумска писменост.