Од ветување до заборав: Муцунски вети урбан кеј, граѓаните добија кал и поплави
Наместо уреден кеј покрај Маркова Река – кал и поплави. Наместо место за рекреација – негрижа и разочарување. Ова е сликата што ги пречека жителите на Аеродром по вчерашниот пороен дожд, кој уште еднаш ги разоткри нереализираните ветувања на градоначалникот Тимчо Муцунски.
Во текот на предизборната кампања, Муцунски со голема помпа најавуваше трансформација на кејот на Маркова Река во вистинска зелена оаза: трим и велосипедски патеки, урбана опрема, простори за одмор и рекреација – место достапно и привлечно за сите генерации. Ветувањата беа примени со ентузијазам од граѓаните, но реалноста, три години подоцна, изгледа сосема поинаку.
Ниту кејот е уреден, ниту е создадено ветеното катче за одмор. Дополнително, остана нереализирана и најавената реконструкција и проширување на мостот што ги поврзува Горно и Долно Лисиче – проект од суштинско значење за секојдневното движење на жителите од овој дел на градот.
Вчерашните поплави беа само уште еден аларм. Калливите улици и преполнетите канали сведочат за тоа колку е запоставена инфраструктурата. Социјалните мрежи се веќе преплавени со објави на револтирани граѓани кои потсетуваат на заборавените ветувања и прашуваат: каде се резултатите?
Додека мандатот на градоначалниците влегува во завршна фаза, недовршените проекти стануваат сѐ погласна тема. Граѓаните очекуваат отчетност, а не нови изговори. Кејот на Маркова Река, наместо симбол на напредок, остана потсетник на неисполнетите зборови и промашените приоритети.