МВР: Разбиена организирана криминална група – четворица приведени во Скопје

Во рамките на истрагата под кодно име „Бункер“, раководена од обвинител од Основното јавно обвинителство за гонење организиран криминал и корупција (ОЈО ГОКК), утринава (21 мај 2025 година) беа извршени претреси на пет локации во Скопје. Акцијата ја спроведоа припадници на Одделот за сузбивање на организиран и сериозен криминал при Министерството за внатрешни работи (МВР), при што беа приведени четири лица, осомничени како членови на организирана криминална група.

При претресот, во домот на еден од осомничените е пронајдено поголемо количество на марихуана, која е одземена и ќе биде предмет на понатамошно вештачење.

Според информациите добиени од истрагата, постои основано сомнение дека приведените сториле кривични дела „злосторничко здружување“ и „убиство“, додека едно од лицата е осомничено и за „неовластено производство и пуштање во промет на наркотични дроги, психотропни супстанции и прекурсори“.

Документите и доказите добиени во текот на истрагата покажуваат дека во текот на 2023 година осомничените станале активни припадници на организирана група која делувала подолг период, со главна цел извршување на убиства по нарачка и од одмазда. За овие дела е предвидена казна затвор од најмалку десет години или доживотен затвор.

Осомничените, следејќи ги наредбите и насоките од организаторот на групата, континуирано преземале активности со цел овозможување на извршувањето на овие кривични дела – од обезбедување логистика до отстранување на пречки. Конкретно, во јули 2023 година, тројца од нив, поттикнати од организаторот, извршиле подготовка и извидување на локација на мета во Македонија и Грција, што резултирало со убиство на припадник на ривалска криминална група на грчка територија.

Исто така, во мај 2024 година, двајца осомничени во близина на таканаречената пластичарска улица во Скопје извршиле убиство на едно лице. При бегството од местото на злосторството, тие отвориле оган кон паркирано возило, при што повредиле неколку лица, од кои едно подоцна им подлегнало на повредите.

Истражните органи продолжуваат со собирање на докази, а приведените ќе бидат изведени пред надлежен судија на претходна постапка, кој ќе одлучува за натамошните мерки.