Мојсоска-Блажевски: Новата царина од САД ќе ја погоди автомобилската индустрија во С. Македонија

Одлуката на САД да воведе царина од 33 отсто за одредени увозни производи е неочекувана и може сериозно да се одрази врз економијата на Северна Македонија – оценува професорката и извршна директорка на „Македонија 2025“, Никица Мојсоска-Блажевски. Таа предупредува дека, иако земјата не е директно таргетирана, ефектите од оваа мерка ќе се почувствуваат преку индиректни канали, особено во автомобилската и петрохемиската индустрија.

„Одлуката е изненадувачка, бидејќи според нашите податоци, Северна Македонија има трговски дефицит со САД – извезуваме околу 110 милиони евра, а увезуваме околу 180 милиони. Врз основа на овие бројки, не очекувавме да бидеме засегнати“, објаснува Мојсоска-Блажевски.

Сепак, податоците на Американското биро за статистика покажуваат различна слика – дека САД има трговски дефицит со Северна Македонија. Оваа статистичка недоследност, според неа, е најверојатната причина зошто земјата се најде под удар на новата царинска политика.

Мојсоска-Блажевски смета дека најголемиот товар од оваа мерка ќе го почувствуваат компании што извезуваат на американскиот пазар преку Европската Унија. „Најсилен ќе биде индиректниот ефект – производите што се произведуваат кај нас, но преку ЕУ завршуваат во САД, ќе станат поскапи и помалку конкурентни“, вели таа.

Според неа, автомобилската и петрохемиската индустрија се особено ранливи на овие промени. Но, покрај нив, погодени ќе бидат и услужните дејности, особено бизнисите отворени од македонската дијаспора.

„Во последниве години, се зголеми бројот на компании што ги отвора нашата дијаспора во Северна Македонија, со намера да извезуваат во САД. Со оваа царина, тие бизниси се ставаат под сериозен ризик, што може да ги обесхрабри идните инвестиции“, потенцира Мојсоска-Блажевски.

Иако засега не се очекува значајно намалување на странските инвестиции, таа повикува на внимателно следење на состојбите и координирани дипломатски напори за заштита на националните економски интереси.