Како на филм: На затвореник од штипскиот затвор му фрлиле дрога преку ѕид

Сериозен инцидент го потресе Казнено-поправниот дом во Штип, откако директорот за извршување санкции, Александар Пандов, откри детали за невообичаена случка што вклучува обид за прошверцување дрога, учество на затворски полицајци и несекојдневно алиби за нивната вмешаност — „изгубен часовник“ кој наводно го земала затворската кучка по име Цеца.

Според кажаното на прес-конференцијата, инцидентот се случил на 20 февруари, околу 21:40 часот. Непознато лице со возило пристигнало пред затворот, минувајќи ја првата капија и застанувајќи кај втората, каде се наоѓа дежурен полицаец. И покрај строго забрането движење за лица кои не се вработени, посетителот не бил регистриран, ниту запишан во службениот дневник.

Набргу потоа, лицето фрлило топка преку затворскиот ѕид, а двајца затвореници, едниот идентификуван како Ж.Ж., познат лик од македонското подземје, заедно со друг затвореник Р.К., се упатиле да ја бараат топката на затворското шеталиште. Еден од нив разговарал на мобилен телефон, што само по себе е прекршување на правилата.

На местото пристигнале и затворски полицајци, кои наместо да ги спречат затворениците, се приклучиле во потрагата. Интересно, дури и откако биле повикани дополнителни полицајци, потрагата продолжила, без успех – барем наводно.

Сабајлето, ситуацијата добила сосема нова димензија – пронајдени се околу 35 грама бела прашкаста материја (веројатно кокаин) и 50 грама марихуана. Полицајците се обиделе да ја оправдаат својата ноќна акција тврдејќи дека не барале дрога, туку скап часовник кој, според нив, го украла затворската кучка Цеца и го изгубила на тревникот.

„Кога командирот и директорот на затворот, Здравев, ги прашале што барале на шеталиштето, објасниле дека му помагале на затвореникот да го најде часовникот кој не бил пријавен воопшто“, рече Пандов. Тој додаде дека е формирана дисциплинска комисија за испитување на случајот, а нагласи и дека најниската плата на полицајците инволвирани во инцидентот изнесува 57.000 денари.

Овој настан покрена сериозни прашања за безбедносниот систем во затворите и можната вмешаност на затворскиот персонал во нелегални активности. Истрагата продолжува, а јавноста очекува одговори – дали навистина „кучката Цеца“ е крива, или станува збор за покритие за многу посериозни прекршувања.