ФФМ со остра осуда и дисциплинска постапка против Шкендија: „За вакви нелуѓе нема место во фудбалот!“

Фудбалската федерација на Македонија (ФФМ) жестоко реагираше на срамниот инцидент што се случи во Тетово, каде навивачката група „Балисти“, поддржувачи на ФК Шкендија, покажаа крајно нечовечко и непристојно однесување.

Во пресрет на натпреварот од 25. коло во Првата македонска фудбалска лига (ПМФЛ) против Брера Струмица, наместо да ја почитуваат минутата молк во чест на жртвите од неодамнешната трагична несреќа со пожар, дел од навивачите решија да ја нарушат тишината со песни и скандирања. Овој срамен чин предизвика бурна реакција кај јавноста и беше осуден од многу страни, вклучително и од највисоката фудбалска институција во државата.

ФФМ веќе покрена дисциплинска постапка против клубот од Тетово, истакнувајќи дека однесувањето на навивачите е „недопустливо непочитување кон загинатите и нивните семејства“. Федерацијата најави преземање на соодветни мерки во согласност со регулативите, за да се осигура дека вакви недолични и нечовечки постапки нема да се повторат во иднина.

„За вакви нелуѓе нема место во фудбалот“, порачуваат од ФФМ, нагласувајќи дека сите клубови мора да покажат човечност и почит во моменти на национална трагедија. Во истиот дух, ФФМ ја пофали Шкендија Арачиново, која во слична ситуација покажала достоинство и солидарност.

Во минатото, Федерацијата веќе презема слични мерки – како што беше случајот во Струга, каде гостинските трибини беа испразнети поради недолично однесување на навивачите. Истото, уверуваат од „Куќата на фудбалот“, ќе важи за сите клубови, без исклучок.

Како потенцијални санкции, се споменува можноста Шкендија до крајот на сезоната да не игра пред своја публика, да настапува на неутрален терен или пред празни трибини. Дополнително, клубот може да се соочи и со парични казни.

ФФМ останува цврсто решена да го зачува фудбалот како спорт на почит, солидарност и човечност, без простор за недостоинствено однесување.