Додека министерот Николоски се фали, странските тур-оператори си заминуваат
Додека министерот за транспорт и врски Александар Николоски самоуверено се фалат со „успесите“ на македонскиот туризам, реалноста на терен е сосема поинаква. Сезоната едвај започна, а Охрид веќе бележи сериозен удар – два големи тур-оператори, „Корендон“ од Холандија и „Реинбоу“ од Полска, ги откажаа летовите за македонскиот туристички бисер.
Повеќе нема да гледаме туристи кои трипати неделно слетуваат од Амстердам или Варшава. Наместо тоа, Охрид останува со неизвесност и надеж дека барем третиот оператор – „Регобис“, сепак ќе одлучи да ја спаси сезоната.
Причината? Хотелиерите, соочени со зголемени трошоци, ја укинаа алл-инклузив понудата. Тоа ја прави Македонија неатрактивна за странските тур-оператори, кои во меѓувреме, без двоумење, си ги пренасочуваат чартерите кон Турција, Албанија или Грција – дестинации кои не само што ја задржаа алл-инклузив услугата, туку ја нудат и по далеку поконкурентни цени.
„Не смееме да ги запоставиме долгогодишните тур-оператори кои со години носат гости во Охрид,“ предупредува Јаким Маленко, тур-оператор од градот. Но предупредувањата се чинат како глас во празнина.
Од ХОТАМ пак, ги оправдуваат цените: трошоците скокнале драстично, и не можеле да се одржат минатогодишните понуди. Според нив, и покрај сè, сме останале меѓу поевтините на Балканот. Но изгледа дека тур-операторите не мислат така – тие си заминуваат.
Во меѓувреме, владата зборува за „отворање кон индивидуални гости“. Но кој ќе ги донесе тие гости? Со што? Со кои директни линии? Само шест авиокомпании и осум дестинации не звучат доволно убедливо за враќање на туристичкиот блесок на Охрид.
Ако оваа ситуација не ги разбуди надлежните, тогаш останува само едно прашање: колку уште сезони ќе дозволиме туризмот во Македонија да пропаѓа, додека владините функционери позираат за камери?