Цените неконтролирано растат, СДСМ со критика до власта: „Немаат решение“

Цените во маркетите достигнуваат рекордно високи нивоа, а зголемувањата на одредени производи одат и до 60%. Според Социјалдемократскиот сојуз на Македонија (СДСМ), ова е директен резултат на неуспешните економски политики на актуелната влада предводена од ВМРО-ДПМНЕ. Од СДСМ предупредуваат дека власта не успеала да го заштити животниот стандард на граѓаните, особено во периоди на криза, како што беше енергетската.

„Како што предупредувавме, мерката за замрзнување на маржите се покажа како краткорочна и неефикасна. Нашите сомнежи дека таа нема да донесе долгорочни резултати се потврдија со постојаниот раст на цените“, изјавија од СДСМ. Тие додаваат дека владините мерки, вклучувајќи ја и т.н. есенска и новогодишна кошничка, не донеле подобрување на животниот стандард. Напротив, ценовниот раст продолжил без прекин.

Партијата ја критикува власта и за игнорирањето на нивната иницијатива за пакет од седум закони, со кои, меѓу другото, се предлага укинување на ДДВ на храната. Според СДСМ, оваа мерка би довела до значително намалување на цените на над 250 производи и би им донела вистинско олеснување на граѓаните.

„За жал, помина цела година, а владата не презеде ништо ефикасно. Последиците ги чувствуваат граѓаните кои едвај врзуваат крај со крај. Власта мора да ја смени својата неуспешна политика и конечно да ги заштити интересите на народот“, изјави портпаролката на СДСМ, Богданка Кузеска, на денешната прес-конференција.

Со оглед на тековната економска состојба, опозициската партија бара итна промена на политиките за да се спречи понатамошно влошување на стандардот и зголемување на цените. Очекувањата на јавноста се насочени кон тоа дали владата ќе понуди нови и поефикасни решенија во наредниот период.