27 октомври 2025
• од Станча Јаќимовски
Основното јавно обвинителство Скопје отвори истрага против 25-годишен скопјанец, осомничен дека на два наврати ограбил фирма за брзи кредити, при што со закана со пиштол одзел вкупно 85.500 денари (околу 1.380 евра). Против него е поведена постапка за две кривични дела „Разбојништво“ согласно член 237 став 4 во врска со став 1 од Кривичниот законик.
Според информациите на Обвинителството, првиот грабеж бил извршен на 15 август годинава во просториите на фирма за брзи кредити лоцирана во Градскиот трговски центар (ГТЦ) во Скопје.
Осомничениот влегол во просторијата и се однесувал како обичен клиент, сè додека не го извадил пиштолот и не ѝ се заканил на вработената. Таа, исплашена за својот живот, ја отворила касата и му ги предала парите — 60.500 денари, по што тој избегал.
Само три дена подоцна, истиот маж повторно ограбил друг објект на истото правно лице, овојпат во Старата скопска чаршија. Со сличен метод и повторно со пиштол во рака, го натерал вработениот да го отвори сефот и одзел 25.000 денари.
По грабежот, осомничениот побегнал во правец на Плоштад Македонија, а по пат го фрлил пиштолот во реката Вардар од Камениот мост.
По двата инцидента, младиот скопјанец бил недостапен за полицијата бидејќи побегнал во Хрватска. Откако бил пронајден и приведен, Обвинителството побара од судијата на претходна постапка да му биде определен притвор, поради опасност да се даде во ново бегство или повторно да изврши кривично дело.
Ненадминливи Понуди Дневно
4.8 (10276 рецензии)
Заштедете 152.00 ден

