Денеска е Света Петка – Преподобна Параскева, заштитничка на жените и верните христијани

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

ДРУГО

Денеска е Света Петка – Преподобна Параскева, заштитничка на жените и верните христијани

27 октомври 2025

• од Станча Јаќимовски

Светата православна црква денес ја одбележува Преподобна Параскева, позната во народот и како Света Петка. Овој празник, кој се празнува на 27 октомври, има особено место во православната традиција, бидејќи во народното предание постојат три светителки со истото име – Параскева-Петка, поради што често доаѓа до мешање на нивните животи. Најпозната меѓу нив е токму Петка Трновска, чиј спомен денес се слави.

Потеклото на името

Името Параскева значи „подготовка“. Во старозаветните времиња, петокот бил ден на подготовка пред саботата – денот на одмор и празнување. Според тоа, и светителките што го носеле ова име биле наречени така бидејќи се родиле во петок или поради симболиката на духовната подготовка.

Животот на Света Петка Трновска

Света Петка Трновска е родена во Епиват, во Тракија, на брегот на Средоземното Море, кон крајот на 10 век. Нејзините родители биле побожни луѓе кои ги воспитувале децата во вера и добрина. По нивната смрт, младата Параскева заминала во Јорданската пустина, каде живеела во пост, молитва и плач, посветена целосно на Бога.

Се хранела скромно – само еднаш дневно, навечер, со растителна храна од пустината. Ѓаволот се обидувал на различни начини да ја искуша, дури и појавувајќи се во форма на ѕвер, но не успеал да ја поколеба нејзината вера.

Последните години и чудесното пронаоѓање на моштите

Кога остарела, ѝ се јавил ангел Господов и ѝ рекол дека е време да се врати во родното место, бидејќи ѝ се приближува крајот. Послушна на Божјата волја, таа се вратила во Епиват, каде набргу починала. Бидејќи никој не ја познавал, жителите ја погребале одделно, како странец, покрај морскиот брег.

По некое време, морето исфрлило тело на патник, кое почнало да се распаѓа и да шири непријатен мирис. Кога жителите почнале да копаат за да го закопаат, наишле на нетленото тело на Света Петка, но не сфатиле дека тоа е свето тело и го погребале заедно со патникот.

Ноќта по погребот, човек по име Ѓорѓија сонил видение во кое му се јавила царица со светли војници и му наредила да ги раздвојат телата, бидејќи Господ сака да ја прослави преподобната своја слугинка. Истото видение го имала и една жена. Утрото, жителите ги послушале нивните сведоштва и со голема свеченост го откопале телото на Света Петка, кое било положено во црквата на Светите апостоли Петар и Павле во Епиват.

Почитта кон Света Петка

Моштите на Света Петка низ вековите биле преместувани на повеќе места, особено во времиња на војни и освојувања, за да бидат сочувани од Турците. Од 1641 година тие почиваат во Романија, во градот Јаш, во црквата „Три светци“, каде и денес се предмет на голема почит и поклонение од верниците ширум православниот свет.