21 февруари 2026
• од Станча Јаќимовски
Денес Православната Црква го одбележува споменот на Свети Теодор Стратилат, еден од најславните великомаченици од почетокот на IV век, чиј живот претставува пример за непоколеблива вера, храброст и целосна преданост на Христа.
Драгоценоста на мачеништвото не се мери само со страдањето, туку и со она што христијанинот доброволно го остава зад себе. Колку е поголемо земното богатство, толку е посветол подвигот кога тоа се заменува со страдање заради верата.
Свети Теодор бил римски војвода (стратилат) во војската на царот Ликиниј, како и градоначалник на Хераклеја. Уживал царска наклонетост, висок чин, младост и убавина — сè што светот го смета за вредност. Но, кога дошло време да избере меѓу земната слава и верноста кон Христа, тој без двоумење ја избрал верата.
Во време на жестоки гонења на христијаните, Свети Теодор јавно го исповедал Христа. Тој не само што одбил да им се поклони на идолите, туку ги урнал сребрените и златните статуи и нивните парчиња им ги раздал на сиромасите. Со својата ревност мнозина ги привел кон христијанската вера и дури самиот цар Ликиниј го повикал да се одрече од суеверието и да поверува во единствениот жив Бог.
Поради својата вера, Свети Теодор бил изложен на страшни маки. Бил биен со шестотини удари по грбот и петстотини по стомакот. Потоа бил распнат на крст и прободен со стрели. На крајот, го погубиле со меч.
И покрај нечовечките страдања, тој непрестајно извикувал:
„Слава Ти, Боже мој, слава Ти!“
Со ова сведоштво покажал дека љубовта кон Христа е посилна од секоја болка и секој страв.
Светиот великомаченик пострадал на 8 февруари 319 година, во три часот попладне, и се преселил во Царството Христово. Неговите чудотворни мошти подоцна биле пренесени од Евхаити во Цариград и положени во црквата Влахерна, каде што станале извор на исцеленија и духовна утеха.
Поради неговиот војнички чин и непоколеблива храброст, Свети Теодор Стратилат се смета за заштитник на војниците и сите што го повикуваат со вера. Неговиот живот останува повик кон верност, пожртвуваност и љубов кон Бога над сè на светот.
Нека неговиот пример нè поттикне и денес да останеме цврсти во верата и во сведочењето на вистината.
СДСМ: Сиљановска бара поголем владин авион додека платите остануваат ниски
Ненадминливи Понуди Дневно
4.8 (10276 рецензии)
Заштедете 152.00 ден

