18 јули 2025
• од Станча Јаќимовски
Пратеничката од СДСМ, Јована Тренчевска, во своето гостување во емисијата „Само вистина“ на Канал 5 остро ја критикуваше актуелната владејачка гарнитура, обвинувајќи ја за неуспешни економски политики и целосна незаинтересираност за заштита на животниот стандард на граѓаните.
Според Тренчевска, минималната плата од 24.000 денари е далеку од доволна за пристоен живот, особено за семејствата кои се соочуваат со постојано зголемување на трошоците. Таа истакна дека ВМРО-ДПМНЕ доследно ги одбива предлозите за зголемување на платите, игнорирајќи ја реалноста на работниците и растечката инфлација.
„Работниците секојдневно се борат за егзистенција, додека Владата ја демонстрира својата социјална глувост. Одбивањето да се поддржат мерки за најзагрозените категории ја покажува целосната неодговорност на власта“, рече Тренчевска.
Таа потсети дека СДСМ двапати предложил законски измени за зголемување на минималната плата, но тие биле отфрлени од страна на ВМРО-ДПМНЕ. Дополнително, Тренчевска ги критикуваше владините мерки како „кошничките“ – есенска, новогодишна, пролетна – велејќи дека тие не дале траен резултат, туку биле само привремени обиди да се прикрие реалната економска состојба.
„Кога овие мерки завршуваат, цените повторно скокнуваат. Тоа е доказ дека немаме долгорочна стратегија. Ребалансот на буџетот, наместо да обезбеди решенија, само прераспределува средства без јасна визија или приоритети“, оцени Тренчевска.
Во своето обраќање, таа апелираше до Владата да покаже вистинска грижа за граѓаните, наместо да се крие зад бројки и шминкање на реалноста. „Сиромаштијата, ниските плати и економската несигурност се секојдневие за илјадници луѓе во Македонија. Владината неспособност е реалност која не може повеќе да се игнорира“, порача Тренчевска.
ВЛЕН: Ќе бидеме глас на еднаквоста за сите институции на албанското наследство