Кузеска: ВМРО-ДПМНЕ брутално ја партизира М-НАВ

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Кузеска: ВМРО-ДПМНЕ брутално ја партизира М-НАВ

18 јули 2025

• од Станча Јаќимовски

ВМРО-ДПМНЕ продолжува со системско уништување на државните институции преку брутална партизација, овојпат насочена кон една од најчувствителните служби – М-НАВ, институцијата одговорна за безбедноста на воздушниот сообраќај. Ова денеска го изјави портпаролката на СДСМ, Богданка Кузеска, остро реагирајќи на новите вработувања во институцијата.

„Во М-НАВ се спроведува класичен упад, каде се отфрлаат професионалци со соодветни квалификации, лиценци и познавање на англиски јазик, а се примаат лица со единствена 'квалификација' – партиска книшка на ВМРО-ДПМНЕ“, истакна Кузеска. Таа наведе конкретни примери, посочувајќи дека меѓу новопримените се наоѓаат сопругот на директорката на Централниот регистар, сопругата на Игор Југ – осуден за насилниот напад во Собранието на 27 април, како и потпретседател на младинската организација на партијата.

Кузеска посочи дека „некои од кандидатите дури и не го познавале англискиот јазик, што е клучен предуслов за работа во оваа институција, а сепак биле фаворизирани и примени. Од друга страна, кандидати без партиска припадност, иако поседувале целосна стручна подготовка, биле одбиени“.

Дополнителен скандал, според неа, е фактот што интервјуата за вработување ги спровеле исклучиво директори од Управниот одбор на М-НАВ, без присуство на претставници од синдикатот на контролори на летање. „Ова покажува дека наместо професионална служба, М-НАВ се претвора во партиска филијала на ВМРО-ДПМНЕ“, додаде таа.

„М-НАВ не е партиска играчка. Таму се работи за човечки животи, за безбедноста на сите нас во воздухот. Оваа институција бара врвен професионализам и стручност, не политичка лојалност“, предупреди Кузеска, обвинувајќи ја владејачката партија дека со ваквите постапки ја загрозува безбедноста на граѓаните и ја урнисува довербата во една од најважните институции во државата.

СДСМ најави дека ќе ги истражи сите правни можности за спречување на ова, како што го нарекуваат, „бескрупулозно партизирање“ и ќе ги информира домашните и меѓународните институции за случувањата во М-НАВ.