02 ноември 2025
• од Станча Јаќимовски
Денеска го празнуваме споменот на Светиот великомаченик Артемиј, славен христијански војвода и маченик кој со својата вера и храброст оставил длабок белег во историјата на Црквата.
Свети Артемиј бил родум од Египет и бил прв војвода на царот Константин Велики. Тој бил сведок на чудесното јавување на победоносниот крст на небото, преку кое Константин го примил христијанството. Артемиј, следејќи го примерот на својот цар, поверувал во Господ Исус Христос и се крстил.
Во времето на царот Констанциј, синот на Константин, Артемиј бил испратен во Елада со света мисија – да ги пренесе моштите на апостолот Андреј од Патра и на евангелистот Лука од Тива во Цариград. Со голема радост и почит ја извршил оваа должност, со што уште повеќе се прославил меѓу верните.
Подоцна бил поставен за августалиј, односно царски намесник во Египет, каде служел праведно и со вера. Иако живеел во време на политички и верски превирања, Артемиј останал непоколеблив во христијанската вера и ја чувал Црквата од прогонства.
Кога на престолот се искачил Јулијан Отстапник, познат по својата омраза кон христијаните, започнало ново страдање. Царот, во подготовките за војна со Персијците, се задржал во Антиохија и таму свирепо ги мачел свештениците Евгениј и Макариј. Видејќи не можел да го поднесе тој ужас, Артемиј храбро застанал пред царот и му рекол:
„Зошто, цару, ги мачиш невините и на Бога посветени мажи? Зошто ја гонеш верата православна?“
Светиот војвода дури му прорекол на Јулијан: „Твојата погибел е близу.“
Разјарениот цар го расчинил Артемиј, го фрлил во затвор и наредил да биде страшно мачен. Иако телото му било ранено и распарчено, во затворот му се јавил Самиот Господ Исус Христос, Кој го исцелил и го утешил. Но Јулијан не запирал: наредил да го положат Артемиј на камен и да го притиснат со друг тежок камен, сè додека неговото тело не било смолкнато и уништено. На крај му била отсечена главата.
Маченичката смрт се случила во 362 година по Христа.
Набргу потоа се исполнила неговата пророчка реч – Јулијан Отстапник срамно загинал во војната против Персијците. Светиот великомаченик Артемиј останал пример на храброст, вера и верност кон Христос до последниот здив.
Денес верниците со благодарност се сеќаваат на неговото дело и молитвено го повикуваат:
Свети великомачениче Артемие, моли го Бога за нас!
Ненадминливи Понуди Дневно
4.8 (10276 рецензии)
Заштедете 152.00 ден

